كتاب تاهيل لشهادة ccna بالغة العربية

والله كلامك صاح
لكن لاحظنا برضو انو كل دولة بترجم اي كتاب بيطلع لي لغتا الام مع مراعاة المصطلاحات العلمية فمثلا انا مشيت لي كوريا الجنوبية ولاحظت انو اي كتاب بيطلع بيترجم بعد يومين للغة الكورية (كل الكتب و حتى الروايات) واليابانيين كذلك وكل الدول المتطورة ولو لاحظته لو ماشي لمنحة لازم تاخد سنة تدرس لغة البلد الماشي ليها
ودي مشكلة كبيرة في الوطن العربي لانو الترجمة متأخرة جدا عشان كدا نحنا متأخرين وبرضو لاحظ انو ما كل الناس بيعرفو انجليزي ، هل ما بستحقو يتعلموا؟
اللغة ما مهمة بالعربي ولا بالانجليزي لكن مهم انو المعلومة تصل للجميع مع مراعاة المصطلحات العالمية
لازم نحنا من منبرنا دا نشجع ترجمة كل الكتب (اي كتاب) للغة العربية عشان تعم الفايدة و حتي البرامج التلفزبونية و الافلام تدبلج للغة العربية عشان في ناس ما بيعرفو يقروا الترجمة (اتذكر كمان عندنا ناس اميين في وطننا الحبيب ما بيعرفوا يقروا)
والعلم للجميع
ولكم جزيل الشكر

لك الشكر الجزيل
أما بالنسبة لموضوع cisco فالامتحان ما بالعربي لكن ممكن الواحد يفهم بالعربي دي انا معاك فيها ... لكن بعدين في الامتحان العربي دا ما بيفيدوا .. فأخير الواحد من البداية يعرف اي معلومة بالانجليزي .. ثم ثانياً اغلب الترجمات العربية ما نافعة لقصورها في الترجمه وخاصة الترجمة السورية (ديل ما بترجموا ديل بيعربوا) وبيفقدوا المعلومه معناها التقني..
ونتمني التواصل .. وشكراً لك مرة تانية

بالنسبة لي موضوعك بتاع المسلسلات دا انا معاك فيهو ...
اما بالنسبة لي الجامعات فهنا بنتختلف .. لانو انا من رأي انو الجامعة تدرس بالانجليزي عشان بعدين ما تصطدم بالواقع انو ما بيشغلوا إلا الزول البيعرف انجليزي فاخير الواحد يكرب لغتوا من الجامعة .. ثم ثانية العلم بتاع الالكترونيات دا العرب ما مساهمين فيهو باي حاجة أم الكوريين واليابانين فليهم باع طويل في الالكترونيات.. فهم ليهم الحق يترجموا الكتب لي لغاتهم ...يعني شوف نحن درسنا الجامعة مع سايسة التعريب وبعد مرات بتكون المادة بالانجليزي وبيدرسوها ليك بالعربي والملخص بالانجليزي وفي الامتحان علي كيفك (عربي ولا انجليزي) فكان معظم الناس (إن لم يكن أغلبهم) بيحلوا الامتحان بالعربي وبيحاولوا يعملوا ترجمة للملخصات .. وبعد ما يتخرج يكتشف انوا ما بيعرف انجليزي (إلا من رحم ربي) ... فعشان كدا أن من مؤيدي أنو الجامعات ترجع لي قديمة ويكون التدريس باللغة الانجليزية من سنة أولي لحدي خامسة .. وياريت يحزفوا منها المواد الما ليها لازمة في التخصص والناس تخش طوالي في العلم المفيد .

أتفق مع الاخ محمد حسين بشدة في نقطة التعريب
للاسف الشديد نحن لا نضيف لهذا العلم حتى تكون لنا مصطلحاتنا
أتوقع أن انتظار التعريب والاتفاق على المصطلحات يعيق ذلك دعونا نأخذ العلم بلغة
أهله ... وعندما نضيف له دعزنا نفرض لغتناا